TG Inter Time Table 2026: తెలంగాణ ఇంటర్ విద్యార్థులకు అలర్ట్.. పరీక్షా తేదీలు వచ్చేశాయ్, షెడ్యూల్ ఇదే..

జనం న్యూస్ : తెలంగాణ ఇంటర్మీడియట్ పరీక్షల షెడ్యూల్ ఖరారైంది. 2026 విద్యా సంవత్సరానికి ఫిబ్రవరి 25 నుంచి మార్చి 18 వరకు పరీక్షలు నిర్వహించనున్నారు. దాదాపు 12 ఏళ్ల తర్వాత సిలబస్‌లో సమూల మార్పులు చేస్తూ.. ఎన్‌సీఈఆర్‌టీ నిబంధనల ప్రకారం కొత్త సిలబస్ ఏప్రిల్ నెలాఖరులోపు అందుబాటులోకి రానుంది.

హైలైట్:
తెలంగాణ ఇంటర్ పరీక్షల షెడ్యూల్ ఖరారు
ఫిబ్రవరి 25 నుంచి మార్చి 18 వరకు ఫైనల్ పరీక్షలు
12 ఏళ్ల తర్వాత సిలబస్‌లో భారీ మార్పులు

తెలంగాణ రాష్ట్ర ఇంటర్మీడియట్ విద్యా మండలి (TS BIE) 2026 విద్యా సంవత్సరానికి సంబంధించిన ఇంటర్మీడియట్ ఫస్టియర్, సెకండియర్ వార్షిక పరీక్షల షెడ్యూల్‌ను ఖరారు చేసింది. రాష్ట్ర ముఖ్యమంత్రి రేవంత్ రెడ్డి, విద్యాశాఖ మంత్రి ఆమోదం మేరకు.. ఫిబ్రవరి 25వ తేదీ నుంచి మార్చి 18వ తేదీ వరకు ఫైనల్ పరీక్షలు నిర్వహించనున్నట్లు ఇంటర్ బోర్డు సెక్రటరీ కృష్ణ ఆదిత్య ప్రకటించారు.

పరీక్షల నిర్వహణ: ఫిబ్రవరి 25, 2026 నుండి మార్చి 18, 2026 వరకు.

పరీక్ష ఫీజు చెల్లింపు: నవంబర్ 1వ తేదీ నుంచి విద్యార్థులు ఆన్‌లైన్ ద్వారా పరీక్షల ఫీజు చెల్లించవచ్చు.

ప్రాక్టికల్ పరీక్షలు: ఫిబ్రవరి 3వ తేదీ నుంచి ప్రాక్టికల్ పరీక్షలు ప్రారంభమవుతాయి. ఈసారి పాత విధానంలోనే ప్రాక్టికల్స్ నిర్వహిస్తున్నప్పటికీ.. ఇంటర్ మొదటి సంవత్సరం విద్యార్థులకు కూడా ల్యాబ్ ప్రాక్టికల్స్ నిర్వహించడం ఈ ఏడాది కొత్త మార్పు. ప్రాక్టికల్స్ ఇంగ్లీష్‌తో పాటు ఇతర భాషల్లోనూ నిర్వహించనున్నారు. గత ఏడాదితో పోలిస్తే ఈసారి దాదాపు 8 రోజుల ముందుగానే పరీక్షలు నిర్వహిస్తున్నారు. ఈ నిర్ణయం వల్ల సుమారు 9.50 లక్షల మంది ఇంటర్ విద్యార్థులు జేఈఈ మెయిన్స్, అడ్వాన్స్‌డ్, నీట్, ఈఏపీసెట్ వంటి జాతీయ స్థాయి ప్రవేశ పరీక్షలకు సిద్ధం కావడానికి మరింత ఎక్కువ సమయం లభిస్తుందని పేర్కొన్నారు. ఇక తెలంగాణ ఇంటర్ బోర్డు దాదాపు 12 ఏళ్ల సుదీర్ఘ విరామం తర్వాత ఇంటర్మీడియట్ సిలబస్‌లో సమూల మార్పులు తీసుకువస్తోంది.ఎన్‌సీఈఆర్‌టీ (NCERT) నిబంధనల ప్రకారం సబ్జెక్టు కమిటీల సూచనల మేరకు సిలబస్‌లో మార్పులు చేస్తున్నట్లు కృష్ణ ఆదిత్య తెలిపారు. ఈ సంస్కరణల్లో జూనియర్ కాలేజీ, డిగ్రీ కాలేజీ అధ్యాపకులు భాగస్వాములవుతారన్నారు. అకౌంటెన్సీ గ్రూప్ రూపకల్పనతో సహా ఇతర కీలక అంశాలపై ప్రత్యేక కమిటీలను నియమించారు. రాబోయే 45 రోజుల్లో ఈ కమిటీలు తమ పనిని పూర్తి చేయాలని లక్ష్యంగా పెట్టుకున్నారు. ఇంటర్ బోర్డు నిర్దేశించిన ప్రకారం, డిసెంబరు 15 నాటికి నూతన సిలబస్‌ను తెలుగు అకాడమీకి అందిస్తారు. ఏప్రిల్ నెలాఖరులోపు కొత్త సిలబస్ పుస్తకాలు విద్యార్థులకు అందుబాటులోకి వస్తాయి. కొత్త పుస్తకాల్లో సిలబస్ వివరాలతో పాటు క్యూఆర్ కోడ్ ముద్రణ కూడా ఉంటుందని సెక్రటరీ వెల్లడించారు.