కంటపడ్డ వింత జీవి.. ఎర్రటి కళ్ళతో నల్లటి ఆకారంతో చూస్తేనే భయం వేస్తుంది..!

కంటపడ్డ వింత జీవి.. ఎర్రటి కళ్ళతో నల్లటి ఆకారంతో చూస్తేనే భయం వేస్తుంది..!

జనం న్యూస్: అది 1995 మార్చి. అమెరికా పక్కన కరీబియన్ దీవుల్లో ఒకటైన ప్యూర్టోరికోలో వాతావరణం ప్రశాంతంగా ఉంది. అక్కడి పల్లెల్లో పొలం పనులు చేసుకుంటున్నారు రైతులు. వాళ్లలో ఓ రైతు... తన మేకల్ని పొలం పక్కన ఉన్న గడ్డి మైదానాల్లో వదిలి వేరే పనికి వెళ్లాడు. ఓ రెండు గంటల తర్వాత తిరిగి మేకల్ని తీసుకెళ్దామని మైదానం దగ్గరకు వచ్చాడు. అక్కడి దృశ్యం చూసి ఆశ్చర్యపోయాడు. ఊరందరికీ వినిపించేలా గట్టిగా అరిచాడు. ఆర్తనాదాలు పెట్టాడు. ఎందుకంటే... అతని 8 మేకలూ చనిపోయివున్నాయి. వాటన్నింటిని మెడదగ్గరా ఎవరో గుచ్చినట్లుగా రెండేసి కన్నాలు ఉన్నాయి. మేకలన్నీ గాలితీసేసిన బూరల్లా... ఎముకల గూళ్లలా కనిపించాయి. వాటిలో రక్తం అన్నదే లేదు. ఏదో పులో, చిరుతపులో వచ్చి దాడి చేసి ఉంటుందని స్థానికులు భావించారు. ఐతే... పులి, సింహం లాంటివి రక్తాన్ని పీల్చవు. పైగా అవి కరిస్తే కోర దంతాల గాట్లు పడతాయి గానీ... రెండు కన్నాలు ఉండవు. అందువల్ల ఆ మేకల తాలూకు రైతు, చుట్టుపక్కల రైతులకు ఆ జంతువు ఏది అనేది ఆశ్చర్యకరమైన ప్రశ్నగా మిగిలింది. ఆ తర్వాత మరో ఘటన. మార్చిలో జరిగిన ఘటనపై పెద్దగా చర్చ జరగలేదు. మీడియా కూడా పట్టించుకోలేదు. ఐతే... 1995 సెప్టెంబర్... అంటే మార్చి ఘటన జరిగిన 6 నెలల తర్వాత మరోసారి అలాంటి ఘటనే జరిగింది. డేవిడ్ నెగ్రోన్ అనే వ్యక్తి... తన మేక చనిపోయి ఉండటం చూశాడు. దాని మెడ దగ్గర కూడా రెండు కన్నాలున్నాయి. అది చూసి షాకైన అతను... ఆ చుట్టుపక్కల ఏ పులైనా ఉందేమో అని కంగారుగా చూశాడు. అప్పుడే ఆ క్షణంలోనే ఎర్రటి కళ్లతో ఓ ఆకారం అతనికి కనిపించింది. అది కుక్క లాగా, కంగారూ లాగా ఉంది. నీటిలో, నేలపై జీవించగలిగేదిలా ఉంది. నల్లగా ఉంది. దానిపై కొంత బొచ్చు ఉంది. దాని తలపై పించం (crest) లాంటిది ఉంది. ఒక్కసారిగా స్టన్ అయ్యాడు. క్షణాల్లో అది పారిపోయింది. ఈ విషయం బాగా వైరల్ అయ్యింది. స్థానికంగా తీవ్ర కలకలం రేపింది. ఎందుకంటే అప్పటికే ప్యూర్టోరికోలో అక్కడక్కడా మేకల వంటివి చనిపోతున్నాయి. కారణం ఏంటో ఎవరికీ అంతుబట్టలేదు. తాజాగా డేవిడ్ చెప్పిన విషయం అందర్నీ భయపెట్టింది. మర్నాడు సివిల్ డిఫెన్స్ పరిశోధకులు మేక చనిపోయి ప్రదేశానికి వచ్చారు. మేకను బాగా పరిశీలించి... మెడదగ్గర ఉన్న రెండు కన్నాలను చూశారు. అది వాళ్లను ఆశ్చర్యపరిచింది. అంతకంటే షాక్ ఏంటంటే... ఆ వింత జంతువు... మేకలోని రక్తం మొత్తాన్నీ తాగేసింది. అందువల్ల ఆ జంతువుకి చుపకబ్రా (Chupakabra) అని పేరు పెట్టింది ప్రెస్. చూపకబ్రా అంటే స్పానిష్ భాషలో... "మేకల రక్తం తాగేది" అని అర్థం. డేవిడ్ మేక చనిపోయిన తర్వాత కూడా మారణహోమం కొనసాగింది. ప్యూర్టోరికోలో వందల కొద్దీ జంతువులు చనిపోయారు. చనిపోయిన జంతువులన్నీ చిన్న చిన్నవే. అన్నీ ఒకే లక్షణాలతో చనిపోయాయి. ఈ కేసు స్థానిక జర్నలిస్ట్ జార్జ్ మార్టిన్‌ని ఆకర్షించింది. ఎక్కడెక్కడ మేకలు చనిపోయాయో అక్కడికి వెళ్లి వాటి యజమానులను ప్రశ్నించాడు. వారిలో చాలా మంది తాము చూపకబ్రాను చూశామని చెప్పారు. వారంతా దాదాపు డేవిడ్ చెప్పినట్లే చెప్పినా... కొన్ని పోలికలు మాత్రం వేరుగా చెప్పారు. అక్టోబర్‌లో ఇదే అంశంపై ప్యూర్టోరికో మేయర్ కూడా దీనిపై స్వయంగా దర్యాప్తు ప్రారంభించారు. ప్యూర్టోరికోలో వరుస ఘటనలతో పోలీసులపై ఒత్తిడి పెరిగింది. ఎలాగైనా ఆ జంతువును పట్టుకోవాలని పై అధికారులు... కిందిస్థాయి పోలీసులకు ఆదేశం ఇచ్చారు. ఐతే.. పోలీసుల్లో ఒకరైన ఏలీజెర్ రివెరాకి... పిచ్చి కోపం వచ్చింది. "ఏ జంతువూ లేదు. ఈ జనాలు లేనిపోని భయాలు క్రియేట్ చేస్తారు. దాంతో మనకు టెన్షన్లు తప్పవు" అని ఫీల్ అయ్యాడు. అలాంటి అతను ఓ రోజు రాత్రిపూట తన ఫ్రెండుతో కలిసి కారులో వెళ్తున్నాడు. రోడ్డు పక్కన అతనికి మెరుస్తున్న కళ్లతో ఏదో కనిపించింది. జాగ్రత్తగా చూస్తే అది చూపకబ్రాలాగా ఉంది. అది కూడా వాళ్లను చూసిందట. అంతే... భయపడి కారును వేగంగా పోనిచ్చాడు. ఒళ్లంతా చెమటలుపట్టేశాయి. ఆ తర్వాత చూపకబ్రా నిజంగానే ఉంది అన్నాడు. 1996 సంవత్సరంలో... అమెరికా... మియామీలో... ఇదే తరహా జంతు మరణాలు సంభవించాయి. దాంతో... ఆ జంతువు ప్యూర్టోరికో వదిలి అమెరికా వచ్చి ఉంటుందనే ప్రచారం మొదలైంది. ఐతే... అమెరికాలో కూడా ఎవరికీ చూపకబ్రా దొరకలేదు. ప్రజల్లో భయాన్ని పోగొట్టేందుకు ప్యూర్టోరికో ప్రభుత్వం... చనిపోయిన జంతువులను అడవి కుక్కలు చంపాయని ప్రకటించింది. ఇందుకు పాథాలజిస్టులు ఇచ్చిన రిపోర్టును ఆధారంగా చేసుకుంది. పాథాలజిస్టులు... అడవి కుక్కల వల్లే... మేకలు చనిపోయాయని తెలిపారు. అడవి కుక్కలే అయితే... మేకలన్నీ రక్తం లేనివిగా... జంతువు పీల్చేసినట్లుగా ఎందుకు ఉంటున్నాయి అన్నది తేలలేదు. 2010 జులైలో... రెండు జంతువులు... అమెరికా టెక్సాస్‌లో చనిపోయి కనిపించాయి. అవి చూపకబ్రాలే అని కొందరు అన్నారు. ఐతే... మిచిగాన్ యూనివర్శిటీ సైంటిస్టులు వాటిపై పరిశోధనలు జరిపి... అవి కోయోట్స్ (Coyotes)అని తేల్చారు. కోయోట్స్ అనేవి ఉత్తర అమెరికాలో ఉండే నక్క లాంటి జంతువులు. కోయోట్స్‌కి ఇన్ఫెక్షన్లు సోకి... చూపకబ్రాల లాగా మారాయనే అభిప్రాయం వ్యక్తంచేశారు అధికారులు. ఇక ఈ మిస్టరీ ముగిసినట్లే అన్నారు. ఐతే... చాలా మంది సైంటిస్టుల వాదనను నమ్మలేదు. ఉత్తర అమెరికాలో కోయోట్స్‌.. ప్యూర్టోరికాలో ఎందుకుంటాయని ప్రశ్నించారు. చూపకబ్రాలు పూర్తిగా వేరే జాతి జంతువులని భావించారు. ఇప్పటికీ ఈ మిస్టరీ ఇలాగే ఉంది. చూపకబ్రాలు నిజంగానే ఉన్నాయా లేదా అన్నది తేలలేదు.