వాలంటీర్ల చెవుల్లో పువ్వులు పెట్టారా చంద్రబాబు గారూ

-ఏఐటీయూసీ జిల్లా ప్రధాన కార్యదర్శి బుగత అశోక్
జనం న్యూస్ 12 జనవరి 
విజయనగరం టౌన్ రిపోర్టర్
గోపికృష్ణ పట్నాయక్
వాలంటీర్లు అందరినీ కొనసాగిస్తామని ఉగాది రోజు మాట ఇచ్చిన చంద్రబాబు గారు ఇప్పటి వరకూ నిలబెట్టుకోలేదంటే వాలంటీర్లు చెవుల్లో పువ్వులు పెట్టారా అని ఏఐటీయూసీ జిల్లా ప్రధాన కార్యదర్శి బుగత అశోక్ ప్రశ్నించారు.శనివారం ఉదయం విజయనగరంలో ఎ.పి గ్రామ, వార్డు సచివాలయ వాలంటీర్స్ యూనియన్ ( ఏఐటీయూసీ అనుబంధం ) అధర్యంలో మున్సిపల్ కార్పొరేషన్ కార్యాలయం నుంచి స్థానిక గంట స్థంభం మీదుగా ఎన్. టీ. ఆర్ విగ్రహం వరకు చెవుల్లో పువ్వులు పెట్టుకుని వినూత్నంగా నిరసన ర్యాలీ నిర్వహించడం జరిగింది.
ఈ సందర్భంగా బుగత అశోక్ మీడియాలో మాట్లాడుతూ మీ ప్రభుత్వం అధికారంలోకి వస్తే వాలంటీర్లు అందరినీ కొనసాగిస్తామని 10 వేలు గౌరవవేతనం పెంచి ఇస్తామని చెప్పిన మీరే ఇంతవరకు వాలంటీర్లుకి న్యాయం చేయలేకపోయారు అంటే వాళ్ళ చెవుల్లో పువ్వులు పెట్టారా అని అడుగుతున్నాం. 8 నెలలుగా వేతనాలు కూడా చెల్లించకుండా వాళ్ళని పండగతో పస్తులు పెడుతున్నారంటే మీకు అసలు మనవత్వమనేది లేదా అని మండిపడ్డారు. దయచేసి వాళ్ళ జీవితాలతో చెలగాటం అడొద్దన్నారు. ఆంధ్రప్రదేశ్ ప్రభుత్వం ద్వారా 2019 నుండి వాలంటీర్లుగా విజయనగరం మున్సిపల్ కార్పొరేషన్ పరిధిలో వాలంటీర్లుగా రాజకీయాలకు అతీతంగా ప్రభుత్వ సంక్షేమ పథకాలను, కార్యక్రమాలను ప్రజల వద్దకు చేరవేయడంలో ప్రభుత్వానికి ప్రజలకు మధ్య వారదిగా ఎంతో కష్టపడి పనులు చేసారని అన్నారు. కరోనా విళయతాండవం చేస్తున్న సమయంలో ప్రభుత్వం ఆదేశాలు మేరకు ప్రాణాలు ఫణంగా పెట్టి ప్రజలకు ఎనలేని సేవలు అందించారన్నారు. 2024 ఎన్నికల సమయంలో కూటమి ప్రభుత్వం అధికారములోనికి వస్తే మా వాలంటీర్స్ అందరికి న్యాయం చేస్తామని, నెలకు 10 వేల రూపాయలు గౌరవ వేతనం పెంచి ఇస్తామని, వాలంటీర్లకు ఉద్యోగ భద్రత కల్పిస్తామని హామీ ఇచ్చారనీ గుర్తు చేశారు. కూటమి ప్రభుత్వం అధికారంలోనికి వచ్చిన తరువాత కూడా వాలంటీరు వ్యవస్థను కొనసాగిస్తామని ఇచ్చిన హామీలకు మేమంతా కట్టుబడి వున్నామని రాష్ట్ర గౌరవ ముఖ్యమంత్రి వర్యులు శ్రీ నారా చంద్రబాబునాయుడు గారు ఉపముఖ్యమంత్రివర్యులు శ్రీ కొణిదల పవన్ కళ్యాణ్ గారు, రాష్ట్ర సాంఘిక సంక్షేమ శాఖ మంత్రివర్యులు శ్రీ డోలా బాల వీరాంజనేయులు గారు మీడియా ద్వారా ప్రకటించారనీ తెలిపారు. కూటమి ప్రభుత్వంలో మాకు న్యాయం జరుగుతుందనే నమ్మకంతో ఎన్నికల సమయంలో గత ప్రభుత్వ రాజకీయ నాయకులు ఒత్తిడి చేసినా మేము రాజీనామాలు చేయలేదన్నారు. వీళ్ళు ఎవ్వరి రికమండిషన్లుతో ఉద్యోగాల్లో చేరలేదని విద్యార్హతలు బట్టి ఇంటర్వ్యూల్లో సెలక్ట్ అయ్యి ఉద్యోగాలు సాధించుకున్నామని తెలిపారు. దయచేసి వాలంటీర్లు పై రాజకీయాలు పులమొద్దు అని ఆవేదన వ్యక్తం చేశారు. కూటమి ప్రభుత్వము అధికారం చేపట్టి 7 నెలలు పూర్తి కావస్తున్నది కానీ ఇంత వరకు వాలంటీర్లుకి ఇచ్చిన హామీలు నెరవేర్చడం లేదన్నారు.  2024 జూన్ నెల నుండి మాకు గౌరవ వేతనం కూడా చెల్లించలేదన్నారు. రాష్ట్ర వ్యాపితముగా వివిధ ఉన్నత చదువులు చదువుకొని ప్రభుత్వానికి ప్రజలకు సేవలు చేయాలనే ఉద్దేశ్యంతో వాలంటీర్ ఉద్యోగాల్లో చేరిన అందరి భవిష్యత్తుకు భరోసా కల్పిస్తారని ఇచ్చిన మాట నిలబెట్టుకొని న్యాయం చేస్తారని ఆశిస్తున్నాము అని తెలిపారు. వాలంటీర్లు సమస్యలను ముఖ్యమంత్రి చంద్ర బాబు నాయుడు గారు దృష్టికి తీసుకుని వెళ్ళి న్యాయం చేయమని కోరారు.ఈ కార్యక్రమంలో ఏఐటీయూసీ జిల్లా అధ్యక్షుడు ఎస్ రంగరాజు, జిల్లా ఉపాధ్యక్షుడు పొడుగు రామకృష్ణ, ఎ.ఐ.వై.ఎఫ్ జిల్లా అధ్యక్షుడు బూర వాసు మరియు విజయనగరం పరిధిలోని వాలంటీర్లు పాల్గొన్నారు.